Innflutningur kvikasilfurlampa verður bannaður frá 1. apríl 2015 samkvæmt Evrópureglugerð. Þetta er hluti af umhverfisverndarátaki Evrópusambandsins, sem einnig tekur til glóperunnar eins og félagsmenn kannast sjálfsagt við. Í Reykjavík má finna um þriðjung af allri götulýsingu á landinu. Um 46% götulýsingar í Reykjavík kemur frá kvikasilfurlömpum. Því er ljóst að talsverð endurnýjun á lömpum er framundan. Nú eru amk tvö tilraunaverkefni í gangi í borginni með götulampa sem nota ljóstvista. Ljóstvistar eru orkunýtnir og rafmagnsnotkun götulýsingarkerfa minnkar með innleiðingu þeirra. Ljósgæði þeirra í samanburði við hefðbundna götulýsingu eru einnig betri.  Það sem er ekki síður áhugavert í þessu samhengi eru þeir stýringarmöguleikar sem ljóstvistar bjóða uppá. Sveigjanleiki í götulýsingu verður mun meiri en áður hefur þekkst.